उनको उम्मेदवारी फिर्ताबारे सामाजिक सञ्जालमा हल्ला भइरहेको समयमा  उनले उम्मेदवारी फिर्ता नलिएको प्रस्ट पारिन् । ‘मैले फिर्ता लिएको छैन । म चुनाव लड्न पाउने/नपाउनेबारे निर्वाचन आयोगमा छलफलमा भइरहेको बेलामा मेरो नामबाट फेक इमेल आयोगमा पठाइएको रहेछ । म यसबारे आयोगमै बुझ्न जाँदै छु,’ उनले भनिन्, ‘कसले यस्तो गरेको हो । म उजुरी गर्छु ।’

जर्मन नागरिकसँग विवाह गरेकी आशिकासँग विदेशी परिचयपत्र छ भन्ने आरोप उनले खेपेकी थिइन् । ‘विदेशी परिचयपत्र छैन । मेरो यतैको पासपोर्ट र यतैको नागरिकता छ,’ उनले भनिन् ।

निर्वाचन आयोगका प्रवक्ता नारायणप्रसाद भट्टराईले धादिङ-१ बाट उम्मेदवारी दिएकामध्ये ईश्वर भारतीबाहेक कसैले पनि फिर्ता नलिएको बताए । ‘अहिलेसम्म यो क्षेत्रबाट फिर्ता लिनेको सूचीमा भारतीबाहेक अरु देखिएका छैनन्,’ उनले कान्तिपुरसँग भने । उनका अनुसार शुक्रबार दिउँसोसम्म देशभरबाट ४९ जना उम्मेदवारले नाम फिर्ता लिएका छन् ।