जनकपुरधाम  – मनसुन भित्रिएपछिको झन्डै डेढ महिनामा सरदर भन्दा कम वर्षा भएको छ । जुन महिना अर्थात् जेठ मध्ययता असार दोस्रो हप्तासम्म सामान्य वर्षा भए पनि जुलाईको पहिलो १० दिनमा वर्षा हुने दरमा कमी आएको देखिन्छ ।

विशेषगरी मधेस प्रदेशमा पानी पर्न सकेको छैन । वर्षा हुन्छ की भन्ने आश गर्दागर्दै धानको ब्याड सुक्न थालेपछि किसान निराश छन् । प्रदेश सरकारले मधेसलाई सुख्खाग्रस्त क्षेत्र नै घोषणा गरिसकेको छ । अन्नको भण्डार मानिने मधेशमा धान रोपाईं हुन नसकेको र रोपाइँ भएका खेतमा समेत धाँजा फाट्न थालेपछि सरकारले सुख्खाग्रस्त क्षेत्र घोषणा गरेको हो ।

रोपाइँ सकिने बेला भैसक्दा बल्ल मधेशमा एक तिहाइ मात्रै रोपाइँ सकिएको छ । कृषि विकास निर्देशनालय, मधेसका अनुसार अहिलेसम्म ३३ प्रतिशत मात्र धान रोपाइँ भएको छ । जबकि, यो अवधिमा ७०/८० प्रतिशतसम्म रोपाइँ सकिनुपर्ने थियो । मधेश प्रदेशमा झन्डै तीन लाख ७३ हजार हेक्टर क्षेत्रफलमा धानखेती हुन्छ । तर, असार सकिन लाग्दा एक लाख २६ हजार हाराहारीमा मात्रै धान रोपाइँ भएको तथ्याङ्क छ । अबका तीन/चार दिनभित्र पर्याप्त पानी नपरेमा रोपाइँ पर्याप्त नहुने र यसले धानको उत्पादन घट्ने जोखिम छ । मधेश प्रदेश सरकारले विशेष राहत प्याकेजको व्यवस्था गर्न सङ्घीय सरकारसँग माग पनि गरेको छ ।