भारतीय अनुसन्धानकर्ताहरूले पहलगाममा आक्रमण गर्नेहरू सबै पाकिस्तानी नागरिक भएका दाबी गरेका छन् ।

भारतीय अनुसन्धानकर्ताहरूले गएको अप्रिलमा भारत प्रशासित कश्मीरको पहलगाम शहर नजिकै पर्यटकहरूमाथि भएको घातक आक्रमणमा संलग्न तीनै जना आतङ्ककारीहरू संयुक्त राष्ट्रसङ्घद्वारा प्रतिबन्धित लडाकू समूह ‘लश्कर–ए–तैयबा’ (एलईटी) का पाकिस्तानी नागरिक भएका बताएका बीबीसीले जनाएको छ ।

प्रहरीले यसअघि तीन जनाको ‘स्केच’ सार्वजनिक गरेको थियो जसमा दुई जना पाकिस्तानी र एक जना स्थानीय रहेका बताएको थियो । आक्रमणकारीहरूलाई आश्रय दिएको आरोपमा दुई जना स्थानीय पुरुषलाई पक्राउ गरेपछि राष्ट्रिय अनुसन्धान एजेन्सी (एनआईए) ले यो दाबी गरेको खबरमा उल्लेख छ । पाकिस्तानले यी दाबीहरूमा कुनै टिप्पणी गरेको छैन ।

लोकप्रिय पर्यटकीय स्थल बैसरनमा भएको आक्रमणले भारत र पाकिस्तानलाई युद्धको सङ्घारमा पुर्‍याएको थियो । कश्मीरलाई लिएर तीन पटक युद्ध लडेका आणविक हतियारधारी दक्षिण एशियाली छिमेकीहरूले यस क्षेत्रलाई पूर्णरूपमा आफ्नो दाबी गर्दै आएका छन् ।

पहलगाममा गएको अप्रिल २२ मा भएको आतङ्कवादी आक्रमणमा एक नेपालीसहित २६ जना पर्यटकको ज्यान गएको थियो ।

यो घटनापछि भारतीय सुरक्षा बलहरूले पहलगाम क्षेत्रमा खोजी अभियान शुरू गरेका थिए र कश्मीरभरि हजारौंलाई सोधपुछका लागि हिरासतमा राखिएको थियो । यद्यपि तीन आक्रमणकारीहरू अझै पक्राउ परेका छैनन् ।