नारायणहिटी दरबार हत्याकाण्डको २३औं स्मृतिमा हिमानी ट्रष्टले सोमबार काठमाडौंको कमलादीस्थित गणेश मन्दिरमा दीप प्रज्वलन गरेको छ।

उक्त दुःखद घटनामा दिवङ्गत भएकाहरूको सम्झनामा आयोजित दीप प्रज्वलन कार्यक्रममा पूर्वयुवराज्ञी हिमानी शाह, उनका सुपुत्र हृदयेन्द्र शाहलगायत पूर्वराजपरिवारका अन्य सदस्यहरूको उपस्थिति रहेको थियो।

विसं २०५८ साल जेठ १९ गते नारायणहिटी राजदरबारभित्र भएको उक्त घटनामा तत्कालीन राजा वीरेन्द्र शाह, रानी ऐश्वर्य, युवराज दीपेन्द्र, अधिराजकुमार निराजन, अधिराजकुमारी श्रुतिलगायत राजपरिवारका अधिकांश सदस्यहरूको निधन भएको थियो।

हिमानी ट्रष्टले हरेक वर्ष जेठ १९ मा दरबार हत्याकाण्डका दिवङ्गतहरूको स्मृतिमा विभिन्न कार्यक्रमहरू आयोजना गर्दै आएको छ। सोही क्रममा आज कमलादीमा दीप प्रज्वलन गरी श्रद्धाञ्जली अर्पण गरिएको हो।